....مقدمة....
مره من المرات وحده إسمها أو لقبها (الجادل) كتبت لي قصيده ..
وأنا رديت عليها بثلاث أبيات .. البعض فهم الأبيات خطأ وحملها على غير معناها ..
وبدأ البعض بالإنتقاد وإتهامي بسوء النية ..
فكتبت هذا الموضوع أرد عليهم .. وأكملت الثلاث أبيات بثماني أبيات أخرى أشرح فيها مقصدي ..
......نبدأ بالموضوع .....
..........................................................
مــســاكــم عــســل ...
زمان الطيب .. وحسن الظن ولى ..
ما صام صومه .. ولا صلى يوم صلى ..
كتبت له وحده .. وقالت .. قوافي من فمها سالت ..
قالت قصيدة وأبيات .. فيها شكوى وأهات ..
بدأت تقول :
ألا ياليتني وياك .. لوحة في يد الرسام
يشكلها يلونها .. على كيفه يصورها
لحد ما قالت :
كذا أضمن غلاه اللي .. حكمني والهوى ظلام
وهو الرسام من حقه .. يكبرها ويصغرها
( الجادل )
ورد عليها بثلاث أبيات ع الماشي .. ثارت بعدها ثورة الواشي ..
ع طول في بالهم سوء الظن .. نسوا أو تناسوا .. أصول الفن ..
قالوا أنت تقصد .. وأنت تقصد .. أنت تلمح .. وتتعمد ..
وقامت الدنيا وصالت .. والكلاب نبحت عليه وجالت ..
ردد أبياته الثلاث .. وكَمَلها ..
وبعالي الصوت .. العالم سَمَعها ..
بثمانً غيرها .. قَفَلها ..
عرفوا خطاهم .. وفهموا القصيدة ومقصدها ..
ياشين التَسَرُع .. عادة ما أشينها ..
ياهيه يابنت ياللي تناديني .. أنا الرسام
عطيني الصورة .. وشوفي كيف بصورها
بَرفَعها وأنَزِلها .. فوق وتحت .. وقدام
بَكَبِرها وأصَغِرها .. وعلى مقاسي بَمَرِرها
شوفي الصوة معي .. حقيقه مو كلام
قالوا التجربه برهان .. ومجهودك يِقَدِرها
لا يروح بالك بعيد .. صورتي صافيه تمام
صورة رسمناها زمان .. والكل سَطَرْها
على دفتر أبو ستين .. والورق أرقام
دفتر هندسة مخطط .. وخطوطه يكررها
صورة الوادي والجبال .. وطيور الحمام
وشعاع الشمس .. والسماء وشجرها
صورة عاشقً مِقْفِي .. بعد رَمْي السلام
هو مِقْفِي وتاركها .. بس عيونه تناظرها
وهي تبكي من الحرقه .. والعَبْره ياحرام
تخفي وجهها بيدها .. ودمعها بَيَنْ مشاعرها
هذا حالنا عِشَاق .. عِشْقِنا على الورق أحلام
عايشينً على الذكرى .. ودنيانا نِمَتِرها
يابنت خوذي من دنيتي .. أحلى غرام
غرام عاشقً مجنون .. بجنونه يفجرها
كتبتها وأعلنتها .. بالحبر ودمع الأقلام
وإفهمي معناي .. ياشمس الصورة ونهرها
الترجمة:
قوافي : أبيات شعر
الكلاب نبحت عليه وجالت : بدأت تدور حولة تريد الهجوم عليه ..
ياهيه : نداء مثل يا هذا ..
على دفتر أبو ستين : دفتر ستين ورقة كنا نستخدمة أيام الدراسة..
دفتر هندسة مخطط : الدفتر مخصص لمادة الهندسة في مادة الحساب أو الرياضيات ...
عاشقً مِقْفِي : عاشق معطي معشوقته ظهرها وذاهب بلا رجعه ...
دنيانا نِمَتِرها : رايحين جايين في الدنيا بلا فائدة ...
وإذا فيه شي مو مفهوم عندكم ناصر الشمري .. ما راح يقصر .. ويشرحها لكم ..
إستمتعوا ..
وتصبحون ع خير وأحلام ع كيف الكيف ..
